गेल्या नऊ वर्षांपासून अख्खं जग ओसामा बिन लादेनच्या टेप बघतंय आणि ऐकतंय. प्रत्येकवेळी या टेप प्रदर्शित झाल्यावर सर्वप्रथम मनात प्रश्न येतात...हे सगळं शूट कुठं होत असेल ? लादेन अद्याप जिंवत आहे ? की अमेरिकाच या टेप बनवून जगभरात वाटतेय ? या प्रश्नांच्या कोंडाळ्यावरच अभिषेक शर्मानं तेरे बिन लादेन हा सिनेमा बनवला. अभिषेक शर्माची ही फिल्म अमेरिका, पाकिस्तान आणि समग्र न्यूज चॅनेल्सवरच हसतेय. जगाच्या पाठीवर कुठं लादेन जिवंत असेलच आणि त्यानं हा सिनेमा बघितलाच तर तोही खदखदा हसेल.
तेरे बिन लादेन चं कथानक पाकिस्तानातल्या कराचीत फुलतं. सिनेमाचा हिरो अली हसन अमेरिकेवर झालेल्या 9/11 च्या दहशतवादी हल्ल्यानंतर अवघ्या तीन दिवसांनीच अमेरिकेत नोकरीसाठी निघतो, मात्र दहशतवादी हल्ल्यानं घाबरलेल्या अमेरिकेतून हसन अलीला दहशतवादी समजून पुन्हा पाकिस्तानात पाठवलं जातं. अमेरिकेतल्या न्यूज 
चॅनेलमध्ये काम करण्याचं स्वप्न उराशी बाळगलेल्या हसन अलीला कराचीतल्या डंका नावाच्या चॅनेलचा पत्रकार बनावं लागतं. डंका चॅनेलचा मालक असलेला संपादकही हसन अलीला कोणत्याही कामासाठी लायक समजत नसतो. हसन अलीचं अमेरिकेला जाण्याचं स्वप्न मात्र राहून-राहून डोकं वर काढतंय. अमेरिकेला पाठवण्यासाठी एक एजंट हसन अलीला 10 लाख रुपयांची मागणी करतो आणि याच काळात हसन अलीच्या डंका टीव्हीतल्या नोकरीवरही टांगती तलवार येते. हसन अलीला डंका टीव्हीचा संपादक कोंबड्यांच्या बांगेच्या अनोख्या शर्यतीच्या कव्हरेजला पाठवतो आणि यावेळी स्टोरी व्यवस्थित झाली नाही तर तुझी नोकरीही गेली म्हणून समज असा इशाराही देतो.
झालं...हसन अली कोंबड्य़ांच्या बांगेच्या शर्यतीचं कव्हरेज करतो मात्र कव्हरेज असं होतं की आता नोकरी जाणारच असं हसन अलीला वाटतं आणि त्याचवेळी हसन अलीची नजर एका फोटोकडे जाते...कोंबड्यांच्या बांगेच्या शर्यतीत विजेता ठरलेल्या कोंबड्याचा मालक नूर पाशा....अगदी हुबेहूब ओसामा बिन लादेन..! हसन अली लादेनसाऱखा दिसणाऱ्या नूर पाशाला फसवून त्याची टेप बनवतो. अमेरिकेला धमक्या आणि इशारे देणारी ती टेप डंका टीव्हीच्याच संपादकांना 10 लाखांना विकतो. ती टेप भारतातील चॅनल्स आणि अमेरिकेत पोहोचते आणि ही नकली टेप असा काही आगंडोंब उसळवते की बस्स...अमेरिका कोणतीही पडताळणी न करता सरळ अफगाणिस्तानवरच हल्ला चढवते.
इकडे हिरो हसन अलीकडे अमेरिकेला जाण्यासाठी लागणारे 10 लाख रुपये तर येतात पण अमेरिका-अफगाणिस्तान 
युद्धाच्या पार्श्वभूमिवर एजंटला आपला कारभार गुंडाळवा लागतो. अमेरिकेचे गुप्तहेर पाकिस्तानात घुसून शोधमोहीम सुरू करतात. एका खोट्या टेपमुळं घाबरलेली अमेरिका कशी धास्तावलीय आणि कशी अंधारात बाण मारण्याचे उद्योग करते हे पाहायला अतिशय मजेशीर वाटतं. अमेरिकेचा एक गुप्तहेर दुसऱ्या गुप्तहेराकडे टेपमध्ये लादेनच्या मागचा नकाशा उर्दूत असल्यानं लादेन पाकिस्तानातच असल्याचा अंदाज व्यक्त करतो. तेव्हा तो गुप्तहेर मग तुम्ही अफगाणिस्तानात मिसाईलचा मारा का करताय ? असा सवाल करतो. तेव्हा पहिला गुप्तहेर सांगतो की एक अब्जाचं बजेट त्याला पाकिस्तानात बसून कॉफीचे झुरके घेण्यासाठी दिलेलं नाहीय. असो...
या सगळ्या गडबडीत अमेरिका आणि पाकचे गुप्तहेर नूर पाशा म्हणजेच नकली लादेनपर्यंत पोहोचतात आणि सगळं सत्य समोर येतं. एका नकली लादेन आणि नकली टेपनं जगाला आणि अमेरिकेला उल्लू बनवलेलं समजल्यावर गुप्तहेरही डोक्याला हात लावतात. पण या खोट्या नाट्यावर पडदा टाकण्यासाठी आणखी एक खेळ खेळला जातो. हसन अली नकली लादेनची मुलाखत घेतो आणि टेपमधली व्यक्ती खरोखरचा लादेन आहे असं सांगून टेप प्रदर्शित केली जाते. या मुलाखतीतून लादेन अमेरिकेला शस्त्रसंधीची (शस्त्र खाली ठेवण्याची) ऑफर देतो आणि व्हाईट हाऊस ही ऑफर तात्काळ मान्य करतं...अमेरिकेसह जगभरात शांततामय वातावरण निर्माण होतं.
माफ करा...सिनेमावर लिहता लिहता अख्खी कथाच सांगण्याचा मोह आवरता आला नाही. सिनेमाची मजा तिच्या कथानकापेक्षा कथानक गुंफण्यासाठी जे वातावरण पडद्यावर उभं केलंय त्याच्यात आहे. प्रत्येक क्षणाला हास्याची कारंजी उडतात.
जाता-जाता एक नोंद..की मीडियावर भाष्य करण्याचा मोह आता चित्रपटांनाही टाळता येत नसल्याचं दिसतंय. पुढच्या महिन्यात पिपली लाईव्ह येतोय. रण येऊन तोंडावर आपटलाय. लव्ह, सेक्स और धोका ची चलती झालीय. तेरे बिन लादेनही चालतोय. कदाचित पिपली लाईव्हही चालेल...चालणाऱ्या सिनेमांत एक साम्य आहे. नवे अभिनेते..छोटं बजेट आणि चांगल्या कथानकाची चांगली गुंफण..! बॉलिवूडच्या मोठ्या स्टार्सनी जो धडा घ्यायला हवा तोच धडा न्यूज चॅनेल्सनीही घ्यायला हवा.